«Ӏомабала лаьрхӀа гӀулакх дӀахьоча юкъа, лоам тӀа балара, Ӏобалара говзал Ӏомайир, болчакха тӀа вилла саг дӀавихьар, из Эсал дехьаваккхар шаьрдир. Уж говзалаш кердайоахаш, цар гойтар Ӏомалуш боагӀарашта, чоалханерча хьалашка нийсвелча де дезар фуд. Итт саг чувоагӀаш йолча тоабан таро хилар шоай бӀаргашца этта хьал го», - аьлар «Сердало» газетага мехка чоалханерча хьалашца къовсам лоаттабеча боахаме.

«Эрше» яхача ПСО нах кӀалхарбоахача тоабо гойтар хьалхашка оттадаь декхараш дика кхоачашде ховш шоаш хилар, шоашта ховш дар юкъедаккха шоаш кийча хилар. МоллагӀа дола дагадоаца чоалхане хьал эттача, шоашта карагӀдаргдар фуд гойта таро хилар цар. Каст-каста цу тайпара Ӏомабалар дӀахьош хиларо гӀо дерий балха говзал лакхъярал совгӀа, ГӏалгӀайчен лоамашка лелача туристий кхерамзлен а Ӏалашо ю.