ӏалам лорадераш квадрокоптерашца болх бе ӏомалуш ба
Квадрокоптерашца болх шаьрбара гӏулакх Махачкале дӏахьош ба, вай мехкара ӏалама моттигашца болх бераш. Из хоам «Сердалога» бир цу оагӏонцарча министерствос.
«Саг чувоацаш гӏетташ долча гӏирсашца дувзаденнарий федеральни проекта «Саг чувоацаш гӏетташ дола гӏирсаш» яхача къаман проектага гӏолла дӏахьош ба ӏомабалара болх», - йоах тхогарча хоамо.
Цу гӏирсашцара тайп-тайпара оагӏонаш чулоацаш йола говзал шаьрйир вай болхлоша. Аттестацех чакхбаьнна, шоаш ӏомадаьр гойта дезаш ба уж. ӏалама моттигий, экологеца дувзаденнарий хьал тахка чӏоагӏа эшаш да тахан уж гӏетташ дола гӏирсаш. Таханарча дийнахьа болх дӏакхахьа кийча я «Геоскан 801» яхача оагӏонцара кхоъ квадрокоптер, «БАС» яхача къаман проектага гӏолла укх шерарча тушола бетта ӏалашъяь, хӏетта арахийца квадрокоптераш.
