Болхлой хилар, МагӀалбика кхалерча кхаш тӀара хьал тохкаш
МагӀалбика кхалерча кхаш тӀара хьал тохкаш болх дӀабихьар Россельхозмоттига, РоссельхозтӀахьожама къахьегамхоша. Из хоам «Сердалога» бир цигарча зарбан болх лелабераша. «ФГБУ «Россельхозмоттига» филиала агрономаша, Кавказерча мехкашта юкъерча РоссельхозтӀахьожама болхлошца, дӀадийнача лаьттай санитарни хьал таьхкар. Ялата зе деш йола дийна хӀамаш, лазараш, оасар ца хилийтара тӀехьа дӀакхухьаш тӀахьожам ба из», - йоах хоамо. «Беркат» яхача боахама кхаш - 475 гектар, царех 300 гектар – гурахьа дувш дола кӀа, 100 гектар- мукх, 75 гектар - кен.
«МагӀалбик» яхача ГУПе 413 гектара тӀарча гурахьа дӀадувча ялатага хьежар болхлой, иштта таьхкар 400 гектар хьажкӀа йийна кхаш. Таханарча дийнахьа хила боаггӀача боараме да ялата хьал.
Лазарех, оасарах, зе деча дийнатех ялат лорадарах йола молхаш тохаш, къахьегаш боахк цига. Респбликерча Россельхозмоттига кулгалхочун гӀонча волча Галай Шамсудина белгалдир; иштта бола болх республикерча дерригача ялатий кхашка дӀахьоргба, аьнна.
Теркалде деза, вай мехкара ялат дика хьувкъаргдолаш, чуэца шортта беркат хургдолаш, дуккха болхлой хьинаре къахьегаш болга.
