Вай хьунашкарча 400 кийла хиллал долча гин дикал техкар
Вай мехкарча хьунашкара гулдаьча 400 кийла хиллал долча гин хьал тохкаш хилар ФБУ «Росхьулораяр» филиала болхлой. Из хоам «Сердалога» бир ӏалама гӏулакхех йолча министерствос. «100 кийла цӏеча нажа, 150 кийла малхбоален попа, 150 кийл къахььэсте ги миштад хьожаш, тохкама болх дӏахьош хиннаб болхлой.
Цун тӏадалар мишта хургда, лазар, зе деш йола хӏамаш йий хьожаш хилар уж. Дӏабихьача тохкамо хьагойтачох, Шолжа кхален хьунашкара малхбоален попа ги геттара дика да, 1-ча класса хьале оттадеш. Наьсарен, Шолжа кхалений хьунашкара цӏеча нажа ги 2-ча класса хьал долаш да», - йоах тхога бенача хоамо.
Паччахьалкхен оагӏонцара декхар кхоачашдеш, кхо сертификат хьаделар гин хьал белгалдеш. Тха газетага дийцачох, гаьний хӏара фу дӏадийна, тӏаккха царех хьахиннараш мехкарча хьунашка дӏа-хьа доаржаду.
Белгалде деза, из болх «Экологически оагӏонцара аьттув» яхача къаман проекта «Хьунаш лораяр» яхача федеральни проектага гӏолла дӏахьош болга.
