«Керда Лакхале - 2024» яхача турнире, белгалваьлар вай спортсмен
22.05.2024 10:22
Эллиной-румий латарах йолча къамашта юкъерча йоккхача турнире дото майдилг яьккхар вай спортсмена. Из хоам тха «Сердалога» бир спорта оагӀон федераци зарбан болх лелабеча ГӀаппархой Айшас.
«Найвальта Игора хетаяь йола из йоккха кхетаче укх шера хӀанз пхезлагӀа дӀахьош я. Россе 35 моттигера, дунен 11 мехкашкара 300 совгӀа латархой гулбелар цхьан доазон тӀа. «Аьде Ахьмад» яхача спорта клубагара вахача Дзейтанаькъан Махьдес 60 кг дозал долча латархошта юкъе дотув даьккхар»,- йоах тхогарча хоамо.
Дакъа лаца юкъе баьхкар цига Китаера, Белорусера, Киргизера, Казахстанера, Азербайджанера, Арменера, Таджикистанера, Иранера, иштта кхыйолча моттигашкара.
