Спортсменаш кийчлуш ба, шоай лоӀамагӀа латарах йолча Россе хьалхале яккхара яхьашка
13.04.2024 17:10
ГӀалгӀай Республикан гулъяьча команданна чувоагӀа 10 спортсмен-лоӀамхо кийчо еш ва Россе дӀахьош йолча хьалхале яккхара яхьашка дакъа лаца, яхаш, дийцар «Сердало» газетага ГӀалгӀай Республикан спортивни латара Федераце викалаша.
«Вай мехка гулъяьча команданна чубоагӀаш ба Имагожанаькъан Аласхан, Дударкъанаькъан Садам, Ӏахилганаькъан Ахьмад, Чаненаькъан
Анзор, Пхьиленаькъан Ахьмад, Шакренаькъан Акромат, Тутайнаькъан Мухьмад-Башир, Газиканаькъан Ислам, Гаьгенаькъан Адам, ГӀантамаранаькъан Мухьаммад. Уж лаьрхӀа ба лакха толамаш даха. Кийчо яр дӀахьош, ондаргаш хилар укх деношка Селий Республике.
Шин кӀира шоашта ховр кердадоаккхаш, латара техника Ӏомаеш хилар уж, дикагӀа болча селий спортсменашца», - аьлар хоамо.
