ГӀалгӀайчен спортсменаш котбаьлар, Москве хиннача бокса сайрене
ГӀалгӀайчен спортсменаша котало яьккхар «Шамо бокс» промоутерий компане кийчъяьча бокса сайрене, из дӀахьош яр Москве, яхаш, дийцар «Сердало» газетага мехка спорта Министерстве.
«Иштта, Тоаркхой ИбрахӀима, технически нокаут ярца, Азимов Максимагара котало яккхар.
Хамхой Элберда шийца латаш хинна Узбекистана викал эшавир. КхоалагӀча спортсмена - Исмейланаькъан Ӏаьлас йилла хинна ха чакхъялале, шоллагӀча раунде котало яьккхар», - аьлар хоамо.
Белагалду, Москве дӀахьош хиннача яхьашка хьажа венавар ГӀалгӀай Республикан физически культура, спорта министр Белхарой Руслан, олимпийски чемпион Йовлой Муса, хӀанз латара юкъе волаш вола UFC лига латархо Йовлой Мовсар, ГӀалгӀай Республикан спортивни латара Федераце вице-президент Дошхьакълой Ӏаьла, наха гӀо деш вола Йовлой Мухьмад-Ӏаьла.
