«Берашта нийса никъ хьехаш къамаьл даьраш бар шахьара имам вола Мержой Адам, дин гIулакха йолча комитета доакъашхо Малсаганаькъан Мухьмад, кагирхой гIулакхех йолча комитета болхло Хьулахой Адам. Кхоана, боккхача новкъа баьнна, вахара никъ дIахохьо безача кагирхошта дайзийтар, тахан вай республике латта хьал, цкъа воча хIаманца бувзам хеттача сага, из хIама дита мел хала хул.

Кагирхой дукха хаттараш дар дийшача нахага. ХIаране уйлаш йоашхаш, ма дарра хьал царна дIадовзийташ, къахьийгар воча хIаман духьала тIом лоаттабераша», — йоах тхога кхаьчача хоамо. «Тахан оаха тхоашта хьалхашка оттадаь декхар — нийсача хIаман тIехьа шун дегаш, бIаргаш хьаделлар! Сага вахар толхадеш, цун ираз доадеш дола бIеха гIулакхаш мел даржаш латт шоана дIахайта гIерт тхо. Бусалба наха юкъе вIалла хила йиш йолаш дац цу тайпара гIулакхаш!

Массахана дег чу лоаттаде деза вай, кхоана воаш кхеллача Далла духьалдаха дезилга, дунен чу леладаь бIеха гIулакхаш цига хоаттаргдолга. Воча хIаман тIехьабаьннараш, дIабувца беза оаш боккхийчарга. Цу наха шоай ираз доадаь ца Iеш, шоай цIагIа мел болча наьха ираз доаду», — белгалдир Малсаганаькъан Мухьмада.