Республикерча къоаной оагӏонца кхетаче дӏахьош хилар вай Мехкада
Вай мехкарча къоаной оагӏонца кхетаче дӏайихьар мехкадас Келаматнаькъан Махьмуд-ӏаьлас. Вӏашагӏкхетаре дийцар мехкарча юкъарлен-политически, экономически, иштта кхыдолча оагӏонашца дувзаденнарех. «Сердалога» из хоам бир мехкадаь зарбан болх лелабераша.
«Вай Президента Путин Владимира массахана белгалдеш да; цхьоагӏо, барт хилар эггара керттера долга. Из да вай лораде дезар! Мехкара хӏама тоадара тӏехьа цар дакъа лацара доккха баркал оал аз вай къоаношта, царна хетар, цар оалар а лоархӏаме да, хӏана аьлча наха эггара гаргагӏа ба уж.
Къоаной оагӏоно дакъа лоац бокъонаш оттаеча, йоаржаеча балха тӏехьа, иштта кхыдола лоархӏаме декхараш кхоачашдара тӏехьа а къахьегаш ба уж. Къаьстта йоккха терко еш дийцар оаха тӏема операцена юкъе дакъа лоацаш болча вай къонгех. Даьхен гӏулакха арабаьнна, тӏема аренаш техкаш лелаш дукха ба вай тахан. Царга, цар дезалашка хьажар, хьашташ кхоачашдар эггара керттерча гӏулакхех да», - белгалдир вай мехкадас, ший интернета оагӏонашка.
Кхетаче иштта дийцар вай даьй баьха гӏалаш меттаоттаеш тахан дӏахьош латтача боккхача балхах. Меценат волча Гуцаранаькъан Микаила рузкъа лоаттадеш, 100 совгӏа кашамаш тоадаьд мехка, Жӏайрахьа кхалера гӏалаш меттаоттаеш къахьегаш боахк. 2026-ча шера 400 совгӏа хургья уж», - теркалдир вай Мехкадас.
Республикан кулгалхоша, къоаноша чӏоагӏдир, вӏаший бувзам лоаттабеш, цхьана болх дӏакхахьа. Из тахан лоархӏаме да вай мехкара вахара-экономически хьал тоадара, бахархошта гаргагӏа хилара тӏехьа.
