ӏаьлий-Юрта хьалъеш йола лорий гӏишло йиллача ханал тӏехьаюсаш я
Дӏадахача шера тов бетта ӏалий-Юрта хьалъе йолаяь гӏишло тӏехьаюсаш я, лаьрхӏа хиннача ханал. Из хьалъе йолайир республикан гӏишлон Министерствон дехарах, 30 сага ӏовижа дарба де моттиг йолаш, иштта 100 саг дийнахьа тӏаэца таро йолаш цхьан сменах, хьалъеш яр из дарбанче. Карарча хана из болх йистебаьннаб 58%, йиллача ханага диллача из йистебала безаш бар укх хана 82%. Цох дийцар «Сердало» газетага гӏишлошъяра Министерствос.
Из гӏулакх къоастадара цига ваха хилар Гӏалгӏай Республикан гӏишлошъяра министр Иленаькъан Муса. Цо белгалдир, йиллача ханал тӏехьавусаш хиларах, «Гранул» ООО бехктокхаме болхло цу хӏаманна бехке ваь хилар, контрактах из доагӏаш ма хиллара.
Цул совгӏа, цун болхлошта хьалхадаьккхар, цу балха даькъ тӏа къахьегараш дукхагӏа хила безилга, тӏехьара тӏа цхьаькха смена а хургйолаш.
«Гӏишлон болх тӏехьабусаш хиларах, хӏара саг бехктокхаме а оттавеш, из болх дӏабахьара йола план оттаяр хьадех. Тӏахьожам хӏара денна хила беза. Хӏаравар ший балха даькъ тӏа белгалде дезаш ва болх дӏахьош хилара хьал», - аьлар министра. «Сердало» газетага ма аллара, цу моттиге, таханарча денга кхоачаш, аьшкабетона кӏийле хьалъяь яьннай, хьалоттадаьд гӏов, кирпишк ӏоюллаш латт, чура йовкъамаш а дӏаехкай. Цул совгӏа, болхлоша чура тхов хьалтехаб, иштта лифта йола кийчо а яьй. Йистедаьннад сердал чуйиллара дола монтажа балхаш, цӏера хьал юхатохара йола кийчо, бӏеха хиш дlаахара эша кӏоагаш дахара болх.
