Наьсаре хьалъеш йола ишкол, ГӀалгӀайчен Ӏаьдала теркама юкъе я
Наьсарен юкъе хьалъеш латта ишкол, ГӀалгӀайчен Ӏаьдало теркама юкъе лоаттаеш я. «Сердало» газета яздаь хиннача беса, хӀанз из гӀишло йистейоалаш я. Карарча хана, гӀишлонхоша терко лоаттаю ишкола спортзала, тӀера балхаш дахара, технологически гӀирсаш Ӏооттадара, гонахьара доазув тоадара.
Тахан из ишкол хьалъяра болх мичахьа кхаьчаб хьежар Паччахьалкхен председатела гӀонча Балахоев М., иштта гӀишлошъяра министр Иленаькъан М.
«Вице-премьер гӀишлон массайолча гӀаташ тӀа хилар. ГӀишлон пенаш арахьара хьалдеттад моттигерча кирпишках, чура балхаш даьд дикача гӀишлон материалах. Проектага диллача, цу дешара моттиге да дешархошта дешара а физически культуранна а мел эшаш дола хьалаш. Цига иштта лаьрхӀай йоккха холл, къаьстта барзкъа хьалъолла моттиг а йолаш. Цу гӀата тӀа я столови, кхача кийчбу моттиг, дешархошта, хьехархошта лаьрхӀа лифт. Массанахьа дикал лакха йола наӀараш оттаяьй, иштта керамогранит Ӏобиллаб. Йиллача хана уж балхаш йистедоахаш латт», - аьлар «Сердало» газетага ГӀалгӀайчен гӀишлошъяра Министерстве.
Белгалду, 720 моттиг йола Наьсарера ишкола хьалъеш я «Дешар» яхача къаман проекта чуйоагӀаш. Из дешара моттиг хьалъяра 640 миллион сом хьожадаьд. ГӀишло хьалъеш латт Чеченская урам тӀа. ГӀишлонна лаьрхӀа хьакъоастадаь лаьтта 22 эзар квадратни метр да.
