Ӏадсаькх кхоссарах толашагӀбарашта юкъевахар ИнгГУ студент
Ӏадсаькх кхоссара говзал эггара лакхагӀа ярашта юкъевахар мехкарча университета студент вола Боранаькъан Ислам. Овшанаькъан Ӏаддал-Хьалима хетаяь дӀайихьача республикан Кубок яккхара яхьашка «Блочни Ӏадсаькх» яхача оагӀонца ше тӀехдика дӀахьекхар цо.
«Ислама из котало тахан хьалхара яьккхаяц. Ӏадсаькх кхоссарах йолча яхьашка дикка белгала волаш, хьавоагӀа из. ДӀахо а иштта лакха говзал йолаш, коталон наькъ тӀа волаш, дӀачакхвала аьттув хилба цун», - дийцар «Сердалога» ИнгГУ зарбан болх лелабераша.
Боранаькъан Ислама къонабарашта гойт, дешари спорти цхьана тарде, лакхленашка кхача хала доацилга. Географически факультета кхоалагӀча курса студент ва из.
Дешар Ислама вахаре лоархӀаме моттиг дӀалоацаш да. Хьинере дешаш вале а, Ӏадсаькх деттарах йолча спорте хила, дикача оагӀорахьа белгалвала низ, говзал тоъ цунна.
Къаьстта из спорт дикка яржаш латт тахан университетерча студенташта юкъе. Ӏадсаькх кхоссар къонабарашта дезаденна, цунца геттара сакъердалуш гӀулакх да.
