Йоккхача яхьашка белгалбаьлар вай мехкара студенташ-филологаш
«Эрсий метта магистраш» яхача ерригача Россе яхьашка белгалбаьлар вай мехкарча паччахьалкхен университета филологически факультета магистранташ бола Цисканаькъан ИбрахӀим, Ӏарчакханаькъан ИбрахӀим. Массехк атта доаца декхар кхоачашдеш, яхьан программах чакхбаьлар уж.
«Уж яхьаш дӀахьораш яр СНГ, кхыча паччахьа карарча доазон тӀа бахача мехкахой гӀулакхех, халкъашта юкъерча бувзамах йола Москвера паччахьалкхен лингвистически университет.
Филологеца, лингвистикаца бувзабенна кхетам лакха хиларах, иштта шоаш Ӏомадаьр лакхача боараме дӀагойта харах, Россе толашагӀа болча магистранташта юкъебахар вай студенташ», - дийцар «Сердалога» университета болхлоша.
ХьатӀабоагӀача бетта Москве дӀахьоргья цу оагӀонцара тӀеххьара кхетаче. Вай республика дӀайовзийташ хургба къона студенташ.
ИнгГУ филологически факультета доккха совгӀат да ала мегаргдолаш да йоккхача яхьашка уж белгалбалар.
Аьттув болаш хилба цар никъ! ДӀахойодача хана а, иштта хьинаре, тӀехдика къахьегаш чакхбала низ хилба цар!
