Къахьегама шоатта дӀадахьа арабаьлар, университета хьехархой, студенташ
17.04.2024 12:11
Къахьегама шоатта кхайкадаь, берригаш хоза барт кхийтта, болх бе арабаьлар университетера студенташ, хьехархой. Дешача моттигашка лостам беш, университета ков цӀендеш баьхкар уж.
«10 сахьат даьлча, дӀадоладелар къахьегама шоатта. Мукъа мел хиннараша хьаллаьцар из беркате гӀулакх. Таханара бӀаьстан ди хоза, къаьга денад. МоллагӀча сага болх бе безам хургболаш ба хаоттам.
Университета барттайна боккха дезал, шоаш дечунца дог ловзаш, къахьегаш ба. Деррига дӀадаьлча, дегӀа а чӀоагӀа эшаш, пайда беш, болх ба из. Ма хоза а хет-кх лостам баь латтача ковна бӀарахьежаш», - дийцар «Сердалога» из беркате гӀулакх хьаллоацаш хиннараша.
