ИнгГУ студенташ дакъа лоацаш хилар «УниверСпортФеста» юкъе
Гӏалгӏай паччахаьлкхен университета студенташ дика гойтар шоай вуз, Ерригроссийски «УниверСпортФеста» юкъе, из дӏахьош яр Шолжа-Гӏалий тӏа. Котало яккха атта деце а, цар гойтар цхьоагӏо, дикал, лоӏам хилар - из да спортивни котало яккхара нийса мах болаш.
«Вай кагирхоша гойтар шоаш дика кийчо яь хилар, ялх даькъ тӏа яхьебаьнна хилар уж: армрестлинг, баскетбол, истола тӏара теннис, футбол, муш озабар, дронаш хахкар. Муш озабарах цар дото майдилгаш яьхар. Цар, шоай низ хиларал совгӏа, яхьаш нийса дӏаяхьарга а кийчо яьяр. Шоллагӏа моттиг цу цӏенхаштарча яхьашка цар лоӏам хиларах, коталонга кхача гӏерташ къахьегарах йоагӏаш а яр. Дронаш хахкара яхьий даькъ тӏа университета борза совгӏат даьккхар. Цар гойтар бокъонца йола цу даькъ тӏара говзал. Лакхача технологей моттиге, технически говзал меттел, сиха сакхетам хила безаш долча даькъ тӏа, вай спортсменаша шоаш говзанчаш санна гойтар. Кхоалагӏа моттиг цу кердадарий оагӏон тӏа- из лакха толам ба, дика кийчо яь хилар а да», - аьлар «Сердало» газетага ИнгГУ.
«УниверСпортФесте» дакъа лацаро дика хьагойт спорт езарий таронаш, иштта кхыча мехкашкарча викалашца говзал екъа а вӏаштӏехьадоал, из а эшаш да. Фестивала, чӏоагӏагӏа бола спортсменаш белгалбу, цо чӏоагӏъю студентий юкъарло, тайп-тайпарча моттигашкарча кагирхой цхьоагӏо хилар а гойт.
