«Яхьебаьннача доакъашхоша ворхӀ даькъа дийкъар из ловзар, цига гойтар шоашта карагӀдоалар: сихал, хьаькъал, шийцарча тоабан денал. Квест-ловзар дӀадолалуш, берашца де дезар хьалхадоаккхаш, болх баьбар. Доакъашхой, де дезар тӀадола каьхаташ хьакхоаччашехь а, сихача боараме шоашта ховр цу тӀа дилла дезаш бар, хӀана аьлча малагӀча тоабо сихагӀа болх бир а дӀалоархӀар яхьашка. Квест-ловзар йистедоалаш белгалйир «Акха дивизи» яха команда, цо яьккхар котало. ШоллагӀа моттиг, дукха царна тӀехьа ца бусаш, «Николаевски дивизи» яхача команда яьккхар. Котбаьннарашта дипломаш, совгӀаташ делар», — аьлар «Сердало» газетага ГӀалгӀайчен культуран министерстве. Из вӀашагӀделлараша яхачох, цу тайпара дӀахьош йолча кхетаченаша массаза а кагирхой безам тӀаоз шоай Даьхен исторена, из чӀоагӀа лоархӀаме а да, тӀехьа тӀайоагӀача тӀехьенна Даьхенцара безам совбоаккхаш бола кхетам балара.