«Курски жӏака тӏа» яхача гӏо деча лагере дакъа лоацаш ба вай студенташ
Цаӏ йолча Россе «Курски жӏака тӏа» яхача гӏо лоаттадеча лагере дакъа лоацаш ба тахан вай мехкарча МЧС колледжа студенташ. «Дика гӏулакхаш доаржадар хьаллоацаш ба хьехархо Галай Асхьаб, студенташ Тоачанаькъан Йоакъап, Йовлой Ислам. Курски областе баха, цигара цхьацца моттигаш меттайоалаеш ба уж.
Марьино яхача юртарча культуран Цӏенгара дӏаболабелар цар болх. Гӏишлон чу йӏовхал хургйолаш, къахьегаш боахк гӏо де арабаьннараш. Массехк ди даьлча, йистебаргба болх, Дала аьннадале», - йоах тхога кхаьчача хоамо.
«Наха вахарера моттигаш меттайоалае гӏерташ къахьегаш болча хьехархоех, студентех доаккхал ду оаха тахан! Боаггӏача боараме из болх чакхбаккха аьттув, низ, хьинар хилда цар!», - аьлар колледжа кулгал деча Мархенаькъан Мусас.
Белгалде деза, хьалхагӏа Галай Асхьаб цу моттигашка гӏо де ваха хиннилга, хӏанз шозлагӏа вахав хьехархо Курски областе.
