Хӏинде мехкарча студенташа Магасе дешара оагӏонцара кхетаче дӏайихьар
Анатомех, эрсий меттах йола дешара оагӏонцара кхетаче дӏайихьар Магасе, Хӏинде мехкара баьхка, вай республикерча паччахьалкхен университете дешаш болча студенташа. «Сердалога» из хоам бир кагирхой кхетачен Цӏенна кулгал деча Чӏасанаькъан Руслана.
«Сага дегӏацарча белгалонех дийцар Къамашта юкъерча доттагӏала клуба доакъашхошта Пандея Судханшус. Урок дукха хӏама чулаьца, геттара дика хилар. Лоархӏамедараш теркалде, уж дашха ӏемар кагирхой. Эрсий меттацарча урока тӏа шоаш тахан бувцаш бола мотт дикагӏа тоабе, шоаш бахача мехка культура, ӏадаташ довза аьттув бар гаьнара баьхкача студентий», - дийцар тха газетага.
Кагирхой Цӏен болхлоша белгалдир, иштта йола кхетаченаш, цхьаккха шеко йоацаш, боккха пайда боаржабеш, юкъера бувзам чӏоагӏбеш, тоабеш йолга.
