Бӏарчча шера карагӏдаьннараш дийцар студенташа, Москверча массазарча викала фусаме
Москверча массазарча викала фусаме хилар «Ираз» яхача юкъарлен оагӏон кхетаче. Россе тайп-тайпарча моттигашка дешаш бола вай мехкара студенташ бар цига гулбеннараш. Дӏахо болх дӏабахьарах, керттерчарех, кхоачашде дезарех дийцар цига.
«Укх шера кхоачашде аьттув баьннарех, юкъедаха дезарех дувцаш бар кагирхой. Къаьстта йоккха терко еш дийцар вӏаший бувзам, барт чӏоагӏбарах; дикача хӏаман тӏехьа шоайла хьаллоацаш дӏачакхбаларах», - хоам бу «Сердалога» мехка столицера.
Пайдане, беркате хургдараш белгалдеш; къамаьл дир студенташа, иштта терко йир дӏахо йоаржае езача проекташта, кхетаченашта. Массане хьаллоацаш, геттара чӏоагӏа доаржаде дезарех да, яхаш, дийцар «Шаьра мотт» яхача гӏалгӏай меттала долча, кхетама хьал довзийтача ловзарах. Тахан наьна мотт лорабар, боаржабар, цун хӏама эшацадалийтар эггара лоархӏамегӏа долча декхарех хинна латт вай къаман хьалхашка. Мотт шаьрбе, кӏоаргагӏа бовза аьттув луш дола беркате ловзар да «Шаьра мотт» яхар.
Студенташа доаржадеш дола хӏама кагирхоша дикка хьаллоацаш дӏадода, «Ираз» яхача оагӏонца къахьегачар тахан тӏатеӏӏа къахьег, къаманца дувзаденнараш эггара лоархӏамеча моттиге хилийта гӏерташ.
