Нижневартовске шоай гӏулакх шаьрдеш, хургба вай мехкара студенташ-мехкдаьттхой
Саькура бутт болалуча деношка, ӏарпенаькъан И. Ю. цӏерах йолча политехнически колледжа студенташ шоай гӏулакх дикагӏа шаьрде бохийтаргба. Нижневартовск яхача шахьарера гӏувнаш тоаеш болх дӏахьош йолча Ермаковски АО цхьаццадараш ӏомадеш хургба; дийша баьлча мехкдаьттан, газа моттигашка къахьега дезаш бола таханара студенташ.
«Малхбузен Сибрерча моттигашка болх ӏомабеш хилар сабар, денал эшаш да; хӏана аьлча цигара хаоттам а дуккха бирсагӏа ба. Кхоана дийша баьнна арабаьлча, шоай гӏулакх дӏахохьош эшаргдараш ӏомадергда цига кагирхоша. Таханарча технологешца болх мишта дӏабода, лораде дезараш малагӏаш да довзаргда царна.
Вай мехкарча колледжо цу моттигаца бувзам лелабу кхоалагӏа шу да. Вай мехкара ӏоухаш бола студенташ, шоай гӏулакх дика ӏомадаь болга белгалдаьд цига, дийша баьлча «ЕПРС» АО болх бе дӏабехаш а моттигаш хиннай», - дийцар «Сердалога» мехкарча дешареи ӏилмани гӏулакхех йолча министерстве.
Вай мехкарча студенташта боккха аьттув луш да, Нижневартовске баха, шоаш ӏомадаьр балхаца шаьрде, дӏачӏоагӏде йиш хилар. Цар къахьегамца чӏоагӏа накъадоалаш хургда из деррига.
