ИЗО паччахьалкхен музея балха лакха мах бир Шолжа-Шахьаре
Шолжа-Шахьара совета кулгалхочо Оздой Ингисхана, шахьара совета депутата Оздой Хьасана баркал аьлар ГӏалгӀайчен исбахьален искусствай Паччахьалкхен музея кулгалхочунна Тӏумхой Любайна, мехка культуран тӀехьале лораеш дукхача шерашка цо дика болх барах.
«Хьо бокъонца йола хьай балха говзанча я, вай даьша йита мах бола тӀехьале лораярал совгӀа, хьайна могар ду Ӏа из массанега кхачийта гӀерташ. Со тешаш ва, Ӏа кулгал деш йола музей дӀахо а иштта тоалуш, дегӀайоагӀаш хургья, хьай кердача гойтамашца, проекташца тхо гӀад а дугаш», - аьлар Оздой Ингисхана.
«Сердало» газетага ИЗО Паччахьалхкен музея зарбан болхлоша яхачох, Тӏумхой Любас баркал аьлар Оздой Ингисхана, Оздой Хьасана; цар ший балха иштта лакха мах барах. Цо иштта белгалдир, музей хьехаеш хилар, из эшаш хилара дола масала да, аьнна. Музея болхлой дӀахо а къахьегара кийча ба культуран тӀехьален мах бараш лорадеш, уж халкъа юкъара хургдолаш шоай болх тоабеш.
