ГӀалгӀайчен начӀал дараш вӀашагӀтехар Россе къамий культурай Центра проекто
Россе къамий культуран Центро, баркал оалаш, каьхаташ дахьийтар ГӀалгӀайчен халкъа кхоллама, культуранна дукха нах юкъеозача кхетачений Республикански цӀагӀа, иштта Пхьилекъонгий-Юртарча, Мужечарча культуран цӀеношка а, цар иштта дика дакъа лацарах Сийлахь-боккхача Даьймехка тӀем тӀа Котало яьккха 80 шу дӀездеш.
«Даьхенцара безам совбоаккхаш бола болам дӀахьош, республике кхоллама проект хьайир, цо вӀашагӀтехар республикан начӀал дараш, цу юкъедоагӀаш хилар Ӏадаташ, илли алара говзал, халхара искусство», - аьлар «Сердало» газетага РДНТ кулгалхочо, ГӀалгӀайчен культуран цӀихезача болхлочо Зурабанаькъан Ахьмада.
Къонача иллиалархочо, Оздой Адама кулгалца Пхьилекъонгий-Юртарча культуран ЦӀагӀа Ӏомалуш йолча Булгучанаькъан Самирас, кхелахошта дӀааьлар «Катюша» яха илли.
Цун белгалдоалаш хилар дувзаденна дар, из къаьстта гӀалгӀай меттала дӀаоалаш хилар, таржам а даь, ГӀалгӀайчен культуран цӀихезача болхлочо Йовлой Илеза. Къонача иллиалархочун хоза оаз тӀехьара тӀа тоайир ГӀалгӀайчен культуран цӀихезача болхлочо Эккажанаькъан Мадена оттадаьча халхаро.
Халхар гойтар сцена тӀа Мужечарча культуран цӀен «Лоаман оаз» яхача берий ансамбло, республикан культуран цӀихезача болхлочо Итазанаькъан Османа кулгал а деш.
Профессиональни проект видео хьисапе яьккхар республикански халкъа кхоллама, нах вӀашагӀкхетача культуран кхетачений халкъа цӀен видеографа Чуранаькъан Ислама. Цун болх бахьан долаш, наьха таро хилар из кхоллама хозал видеога гӀолла го.
ГӀалгӀай мехка гойтар, таханарча заман кхоллама проекташ, искусствон тайп-тайпарча таронашка йоахаш, цар шоай къаьстта йола белгало йоа а ца еш, хьае йиш йолаш хилар.
