«Кванториум» яхача технопарко ӏТ езайолийт берашта
«Кванториум» яха технопарк я хоамий технологешцара берий безам совбоаккхаш. Магас-Шахьара дешара Центре цу даькъ тӏара кхетаче хилар берашца, яхаш, хоам бу «Сердало» газетага из болх вӏашагӏбеллараша.
«Ше къамаьл деш, технопарка кулгалхочо Янданаькъан Салмана лоархӏаме хоам бир хоамий технологешца шоай вахар дувзадаьча нахах. Цо белгалдир, таханарча технологей замах мишта сиха хувцалуш доагӏа хоамий дуне. Цо иштта аьлар, цу хьалашка болх бе ховш хилар мел лоархӏаме да», - йоах дешара моттиге.
Цул совгӏа, хаттар-жоп яхача кепара довзийтар цох а иштта кхыча темах а дар. Кхетаче чакхйоалаш, дукха хилар берий технопарке деша аха безам бараш.
«Цу тайпара кхетаченаш дӏахьош хиларо таро лу берашта дикагӏа довза «Кванториума» балха дакъа, цар иштта хьалхара гӏа боаккх шоай професси харжа», - аьлар Янданаькъан Салмана.
