1992-ча шера эттача хатара хетаяь кхетаче дIайихьар Юкъерча Ачалкхе
1992-ча шера гуйран бетта эттача доккхача, унзарча хатара хетаяь кхетаче дIахьош хилар, Юкъерча Ачалкхерча культран ЦIагIа. Библиотекан болхлошца цхьана кийчбаьча балхо хьагойтар; цу хана, цхьаккха бехк боацаш, шоай даьй лаьтташкара гIалгIай бохабеш эттар цхьаккха хана дицлургдоацаш долга.
«Культран ЦIагIарча бераша гулбеннарашта кийчъяь хиннар йоккха, кIоарга чулоацам болаш программа яр. XX-ча бIаьшере лаьттача политически репрессеша миллионаш адамий вахар халчаоттадарах дийцар кхетаче. Документальни, исбахьален оагIонцара болх бар бераша гойташ хиннар. 1992-ча шерарча гуйран хана гIалгIашта, хIирашта юкъе эттача хатарах дувцаш, уж денош къаман исторе цIаккха а дайлургдоацилга, бехк боаца адам шоаш мел Iоадаьчох доаккхаш, тхьовра денз шоай даьй баьхача мехкара дохадеш, оттадаь доккха Iазап къаман вахаре Iаьржа, хала лар йита долга белгалдир. Вахар хаьдар дукхача наьха, тахан а дукха ба де доацаш байна, наха шоай мел бола низ Iобуллаш хьалдаь боахамаш сийнача алаца доагаш урагIъахийтар. Из сурт адама дицлургдац», - дийцар «Сердалога» кхетаче дIахьош хиннараша.
Книжкай гойтам а бар цига кийчбаь - «Дагалоаттам болча, бIаргий хиш да». Шоай мехках доахаш, Iазап тIалоаттадаьча бIарччача къамий вахарах дувцар исторически, литературни каьхаташа. 1992-ча шера вайна тIаэттар ма дарра гойташ дола каьхаташ дукха дар цига гулдаь.
Мел дукха ха мара ца яларах, харцонца тIабена бала адамий дегашка бицлуц, байлуш а хилац. ВIалла а дIадовргдоацача шаькъаца кхеллача исторе Iодижад из!
