Вай мехкарча кхаь штангиста майдилгаш яьхар
Езача атлетиках «Ади Ахьмад» спортивни клубе Iомалуш волча ГIалгIайчен кхаь спортсмена Ростовски областе дIахьош йолча Ерригроссийски яхье майдилгаш яьхар, яхаш, дийцар «Сердало» газетага ГIалгIай Республикан спорта Министерствон зарбан болх лелабеча ГIаппархой Аишас.
СССР олимпийски чемпиона Удодов Ивана хетаяьча кхетачене дакъа лоацаш хилар мехка 12 моттигера вена 300 спортсмен. Шоай физически кийчо Шахты-Шахьаре гойтар 10-12 шу, 13-15 шу даьннача бераша, иштта боккхагIчар.
Вай мехкахочо Малсаганаькъан Ахьмада котало яьккхар 67 кг дозал дарашта юкъе (10-12 шу). Цун катохара даькъ тIара толам бар 30 кг, меттагIъяккхар 48 кг, двоеборье 78 кг. Йовлой Анзора кхоалагIа моттиг яьккхар 89 кг дозал дарашта юкъе (12-16 шу). Цо гойтар толамаш: катохар – 100 кг, меттагIъяккхар - 120 кг, двоеборья - 230 кг.
Солсанаькъан Адама дото совгIат даьккхар, дозал 81 кг долаш (12-16 шу). Цун толам: катохар - 82 кг, меттагIъяккхар - 101 кг; двоеборье - 183 кг.
Белгалду, совгIаташ даьхараш Iомалуш ба Наьсарерча лаьрххIача езача атлетика зале, иштта Пхьилекъонгий-Юртарча спортивни комплексе, Галай Мурада кулгал деш.
