«Даьхен Кубке» дакъа лоацаш хилар вай мехкара СВО кхо доакъашхо
Кулгаш гӀортадарах йолча ерригача Россе яхьашка дакъа лоацаш хилар вай мехкара тӀема операце кхо ветеран. «Даьхен Кубок» дӀайихьар, укх бетта 4-ча денгара 7-ча денга кхоачаш. «Сердалога» из хоам бир «Даьхен лорбой» яхача ганза моттигерча филиала болхлоша.
«Ленинградски областерча Гатчина яхача шахьаре шоай дегӀа низ гойташ хилар Россе 31 моттигера 75 вахархо. Новразанаькъан Ӏаьла, Баьтаранаькъан Мухьмад, Албохчанаькъан Джабраил юкъе болаш хинна вай тоаба дикка белгалъяьлар цига.
Шоай дегӀа низ тахка аьттув баьлар ветераний, иштта кхыча моттигашкарча тӀема доакъашхошца доттагӀал тасса таро хилар», - дийцар тха газетага.
«Кулгаш гӀортадар спорт хинна Ӏац, хьай дегӀаца низ, кадай хилар малагӀча боараме да хоалу хьона, коталонга кхача гӀерташ къахьегаш», - белгалдир Новразанаькъан Ӏаьлас.
