Къарший-Черсий мехка дӀайихьача яхье, 3-гӀа моттиг яьккхар вай наьк дераша
Къарший-Черсий мехка дӀахьош хиннача мехкашта юкъерча наьк дерий яхьашка, 3-ча лагӀа тӀа баьлар вай кагирхой. Из хоам «Сердалога» бир Минспорта болхлоша.
«Къилбаседа Кавказерча наьк дерий 10 клубера 230 совгӀа спортсмен гулваьвар турнира. Ший лоӀамерча кепе 4-зза 50 метрага кхоачаш наьк деш хиннача эстафете вай спортсменаш белгалбалар лоархӀаме да», - йоах тхогарча хоамо.
Россе турпал волча Боташев Канамата хетаяьча яхьашка тайп-тайпарча оагӀонцара 5 майдилг яьккхар вайчар. 100 метр наьк даьча 13 шу даьннача Шаденаькъан Мухьаммада дото ши майдилг яьккхар 540 очко йолаш, иштта борза майдилг луш а белгалваьлар из 100 метрага кхоачаш наьк деча.
Борза майдилг кхаьчар Угурчанаькъан Мухьмадага, 100 метра тӀа белгалваьнна, 14 шу даьннача Мартазанаькъан Мухьмада котало яьккхар. Из сов кадай хиларо дог ураоттадаь бар кхелахой.
КӀаьнкаш кийчбеш хиннар ва наьк дарах йолча мехкарча Федераце президент Малсаганаькъан Ӏамархан.
