ГӏалгӀайчен тхэквондисташ котбаьлар, СКФО хьалхале яккхара яхьашка
Тхэквондох йолча ГӏалгӀайчен вӀашагӀтехача тоабо тайп-тайпарча боарамах йола майдилгаш яьхар, Къилбаседа Кавказа федеральни куран хьалхале къайсача, яхаш, дийцар «Сердало» газетага моттигерча спорта Министерствос.
«190 гаргга 12-14 шу даьнна ондаргаш цу яхье дакъа лоацаш хилар. Программанна чудоагӀаш дар олимпийски дакъа, из дар цхьацца раунд 1,5 минот йолаш, кхо раунд дӀаяхьа езаш. Бух соццаш котбаьннарех хилар Хидиранаькъан Абу-Бакар (57 кг), Чуранаькъан Микаил (41кг), МутаӀаланаькъан Ӏаддал-Малик (33 кг). Овшанаькъан Мухьаммада дото совгӀат даьккхар 57 кг дозал долчарна юкъе.
Тиймарзанаькъан Дамир кхоалагӀча моттиге хилар 33 кг дозал дарашта юкъе. Цига толамаш дахарах, спортсменаш таро йолаш ба Одинцово оалача шахьаре дӀахьоргйолча яхьашка дакъа лаца», - йоах хоамо.
Цул совгӀа, вай кагирхоша дика толам баьккхар тоабанна юкъара карагӀдаьннар дӀалоархӀача даькъ тӀа, цига шоллагӀа моттиг яьккхар цар.
