Нальчике хиннача яхье белгалбаьлар вай тхэквондисташ
Республикерча 14 тхэквондистах латтача тоабо 5 дошо, 3 дото, 6 борза майдилгаш ера вай мехка, «Кавказа Кубок» яхача турнире белгалъяьнна. «Сердалога» из хоам бир спорта гӀулакхех йолча министерствоc.
Тайп-тайпарча моттигашкара дикагӀа бола спортсменаш бар цига гулбеннараш. Республикерча тоабо кхоалагӀа моттиг йоаккхаш, тхэквондисташта совгӀаташ луш чакхдаьлар вӀашагӀкхетар. Овшанаькъан Мухьмад-Амин (61 кг), Меданаькъан Адам (41 кг), Мержой Ӏаддал-Малик (41 кг), КӀуренаькъан Муслим (33 кг), Циздой СаӀад (32 кг) лакхерча лагӀа тӀа баьлар. МутаӀаланаькъан Ӏаддал-Малик (37 кг), Хьаьшанаькъан Мухьаммад (37 кг), Хидиранаькъан Абу-Бакр (61 кг) шоллагӀча моттиге хилар.
Борза майдилгаш яьхар Хуценаькъан Мухьаммада (37 кг), Тебой Мухьаммада (37 кг), Тебой Азамата (32 кг), Къамурзой Ӏадрахьмана (49 кг), Къамурзой Мухьмад- Басира (33 кг), Гаьгенаькъан ИбрахӀима (37 кг)», - дийцар тха газетага.
