ТЮЗо «Чипполино» яхача спектаклага хьажа дех бераш
«Чипполино» яха спектакль гойтар укх деношка зӏамигача хьаьшашта берий театре. Терроризм яхача доккхача зулама духьала къовсам лоаттабе цхьанкхетача Денца дийза дар из гӏулакх. Спектаклага хьажа бийхабар Пхьилекъонгий-Юртарча № 1 йолча ишкола дешархой, Наьсарерча ишколе-интернате ухараш, дегӏа могашал эшаеннараш, «Даьхен лорбой» яхача ганза терко еш, тӏахьожам лоаттабеча дезалера бераш.
«Чӏоагӏа дог айденна дар бераш. Дог майрача кӏаьнка, Чипполиной вахара наькъах дувцаш хиннача, харцача хӏаман духьала къовсам лоаттабарах йолча спектаклага геттара хоза хеташ хьежар уж. Вӏаший гӏо деш, дика хӏама доаржадеш, воча хӏаман никъ хоадабеш хилар вахаре мел лоархӏаме да гойтар берашта спектаклага гӏолла», - дийцар «Сердалога» берий театре.
Артисташта доккха баркал оалаш бар дог айденна зӏамига хьаьший. Сцена тӏа царна бӏаргадайтар, зӏамига ва аьнна доацаш, моллагӏча сага мел дикаш доаржаде йиш я дунен тӏа, харцача хӏаман духьаллатташ. Дикача гӏулакхий моттиг массахана лакхе хургйолга, воча хӏаман духьала массавар цхьана латта везилга, адамашта юкъе машар, безам хила безилга кхетадир хьажархоша. Чӏоагӏа раьза долаш дар залера арадоагӏаш хинна бераш.
