40 шера болх беш хьайоагӀача хьехархочун дешархоша яхьашка котало яьккхар
«ДикагӀа йола хьехархочун класс - 2024» яхача мехкашта юкъерча яхьашка котало яьккхар 40 шу совгӀа хьехархочун болх лелабеш хьайоагӀача Бацайнаькъан Лизас хьийхача дешархоша. Яхьаш дӀайихьар Шолжа-ГӀалий тӀарча хьехархой университете. Ӏаьлий-юртарча гимназера дийша арабаьнна дешархой бар яхьашка дакъа лаца бахараш. Из хоам тха «Сердалога» бир гимназена кулгал деча Дибаранаькъан Заремас.
«Психолого-хьехамчий оалача классерча Бацайнаькъан Лизас хьалхале лелаеча дешархой аьттув баьлар хьалхарча даькъа чуйоагӀа сочинени дика язъе.
Цох чакхбаларах дикагӀа волча бархӀнена юкъе нийсбелар Йовлой Ӏайшет - «2024 педклассе дикагӀа дешаш чакхъяьннар», Хамхой Ясмина - «Педклассе дикагӀа йола дешархо», - йоах тхогарча хоамо. Йовлой Ӏайшета 6-ча классе дешача берашца урок дӀайихьар. Комиссен юкъе хиннараш паччахьалкхен университетера хьехархой бар. Вай мехкахочо дӀабихьа болх лакхача боараме хийтар царна.
Кхувш латтача тӀехьенна кхетам баларах бола видеогойтам кийчбаьбар ТӀолданаькъан Раянас, Бобхой Эльмирас, Налганаькъан Марета, Йовлой Ӏайшета. Хьехархой балхах йола лекци йийшар Хамхой Ясминас. Кулгалхо йолча Дибаранаькъан Заремайна грамота елар цига, иштта доккха баркал кхайкадир куратора Бацайнаькъан Лизайна.
