УФСБ сунт техар, къайлагӀа ГӀалгӀай мехка болх беш йолча криптоферманна
ГӀалгӀай Республике гӀолла йолча Россе кхерамзлен Федеральни гӀулакха урхаллен болхлоша дикка болх дӀабихьар, къайлагӀа лелаеш йола криптофермаш гучайоахаш, уж яр Наьсарен кхален Сурхо тӀа.
«Хьем боаццаш болх дӀахьош, цхьан саг чу ца вахача моттиге гучаяьккхар, къайлагӀа дӀахетта латта оборудовани майнингаца криптовалюта деш. Белгалдир, криптоферма лелаераша къайлагӀа ток дӀаозаш хиннилга. Цох хинна зе хӀанз укх сахьате дагардеш да говзанчаша»,- аьлар «Сердало» газетага ГӀалгӀай Республике гӀолла йолча Россе УФСБ зарбан болх лелабераша.
Белгалду, Россе Паччахьалкхен соцамах, мехка 10 моттиге, цу юкъе ГӀалгӀайче а йолаш, могадеш дац майнинг лелаяр. Из бокъо ехкар чӀоагӀдаьд, 2025 шера наджгоанцой бетта 1-ча дийнахьа денз 2031 шера тушола бетта 15-ча денга кхаччалца.
КъайлагӀа лелаеча криптофермаша хьакхолл моттигерча энергосистеманна лоархӀаме кхерам. Уж лелаярах боккха низ тӀабода ток лоаттаяра даькъа, тӀаккха бахархой электроэнерги йоацача хьале кхоач. Цул совгӀа, из Ӏаткъаш хул юрта бахача наьха вахара хьалашта, цар лоархӀамеча гӀишлошта.
ГӀалгӀай Республике гӀолла йолча Россе УФСБ тохкама болх дӀахьу, бокъонах йоацаш, шоаш бахача моттиге майнинг лелаяр. Бокъонаш телхаераш бехктокхаме озаргба доагӀаш долча законах.
