МагӀалбикера Димитрова оала урам тоабеш латт
11.08.2025 11:45
Вахара моттигаш тоаярах йолча къаман проектага гӀолла, тоабеш латт МагӀалбикера Димитрова оала урам. Из хоам «Сердалога» бир шахьара администраце.
«Стройальянс» яха ООО, Элтемаранаькъан Б. кулгалдеш волча моттига къахьегамхой ба из болх чакхбоаккхаш боахкараш. Карарча хана лакхера моттиг шаьръяь, асфальт ӀотӀабилла кийчъяьй цар», - йоах тхогарча хоамо.
ГӀашлой никъ тоабеш латт цига. ДӀахо, асфальт ӀотӀабилла, керда лампаш егӀа, дӀахьоргба болх. Машинашта, гӀашлошта атто еш хургба керда никъ.
Йиллача хана чакхбаккха лерхӀ беррига болх. Шахьарерча хьакимаша тӀахьожам беш дӀахьоргба из.
