Наьха бокъонаш лораяра тӀехьалатта кийча ба цигара болхлой
ХӀара дийнахьа бахархой тӀаийбеш, Ӏаьдало царна енна бокъонаш лораяра тӀехьа къахьегаш, цар га хьаллоацаш болх дӀакхухьаш ба УПЧ а цун гӀончий а. Из хоам «Сердалога» бир цу моттигерча зарбан болх лелабераша.
Масала, укхаза тӀабаьхка хилар Эккажкъонгий-Юртара, Эбарга-Юртара кхалнах. Цхьанне яхаш йолча моттигаца кхоачамбоацараш да, вокхан - пенсеца. Цар тӀадена хаттараш хьатӀаийца, тохкаш ба бокъонаш лораераш.
«Сердало» газетага дийцачох, сага бокъонех волча викала хӀара оршот, пӀаьраска деношка 9 сахьатагара делкъийна сахьат даллалца бахархой тӀаийбу. УПЧ болхлоша, бахархой салоӀаш долча деношкара дӀаийккхача, хӀара дийнахьа тӀаийбу 9 сахьатагара пхи сахьат даллалца, болх соцабеш йола ха - сахьатагара ши сахьат даллалца.
«ХьатӀавоагӀача сагага паспорт хила деза, иштта ше тӀадена хаттар каьхата тӀа дӀаяздаь хила деза. Адрес: Магас, Малсаганаькъан Д. цӀерах болча урама № 11. ХьатӀадувла, тхо шоана гӀо де кийча да», - белгалду УПЧ.
