Боккхача дезала наьна бокъонаш меттаоттайир сага бокъонех волча викала
Россе вахара ганзера ший дезала доагӀаш дола ахча хьадаккха аьттув ца боалаш, лийннача ялх бера нанна гӀо дир сага бокъонех волча викала. Берашта доагӀа ахча харцахьа лаьрхӀад, аьнна, латкъа ера кхалсаг.
«Сай зӀамагӀа долча шин бера доагӀа ахча хьада, аьнна, дехар яздир СФР Госуслугашка гӀолла. Цхьа ха яьлча юхадера жоп; 50%-га кхоачаш мара дагӀац шоана ахча, аьнна. Тхо раьза дац цу гӀулакха! Сои са мари балха дац, цӀенда могаш воацаш хилар бахьане, пенси доагӀаш ва, кхы цхьаккха моттигера хьатӀадоагӀаш хӀама а дац тхона. Боккъал а гӀо де тхона», - яздаьд дог дехача Сурхо тӀарча яхархочо.
Сага бокъонех волча викала Россе вахара ганзага гӀолла техкар из гӀулакх. ХӀара бера 14 294 сом ахча доагӀаргдолаш соцам бир цига. Ялх бер долча цӀенна доккха новкъостал хургда цу ахчах.
