СИЗО хьалашка хьожаш хилар сага бокъонех вола викал
Илдарха-ГIалий тIарча №1 йолча тохкама изоляторе ший аргIанара болх дIахьош хилар, сага бокъонех вола викал ЦIечой ИбрахIим. Цу моттигерча администрацеца бувзам болаш дIахьош бар из болх. СИЗО-1 кулгалхо, мехкарча Россе ОФСИН кулгалхочун гIонча вар цига дакъа лоацаш. Тохкама изолятораца дувзаденна мел дола керттердараш юкъелоацаш, чакхдоаккхаш дар из гIулакх.
«Iаьдало дIалийца боахкараш Iеш йолча камерашка хьожаш, царна кхача телара гIулакх, иштта кхыдараш малагIча хьале да тохкаш болх дIабихьар цига. Сага бокъонех волча викала ЦIечой ИбрахIима белгалдир, цу моттига кулгалхошца массахана бувзаме хилча, лийца боахкарий бокъонаш лораяра тIехьара болх дIакхахьа аттагIа долга», - йоах «Сердалога» бенача хоамо.
Хан-ханнахьа иштта кхетаченаш дIакхахьаро дукха хIама меттадоаладайт. Белгалде деза, сага бокъонех волча викала из болх нах лийца боахкача моттиге каст-кастта дIакхухьаш болга.
