Хьехархочунна гӀо дир сага бокъонех волча викала
Дешара оагӀон лоархӀаме болхло йолаш хинна Наьсарера яхархо, цхьаккха тайпара хьатӀадоагӀаш хӀама доацаш йисар. Цу гӀулакха оарцагӀа вахар сага бокъонех вола викал. 40 шу совгӀа йола ха хьехархо йолаш яьккхача сага пенси соцадир мехка, хӀаьта цо гӀо дийхар сага бокъонаш лораерашкара.
«Ӏаьдала бокъонах сона доагӀаш дола пенси хьадоладалийта гӀо де сона! Республикерча ОСФР багӀача болхлоша НГӀАССР латтача хана аз баьча балхах каьхаташ дац, яхаш, из гӀулакх могадац сона. Уж каьхаташ царна дӀатӀадахьа са аьттув бац, хӀана аьлча архив йисаяц, бакъда са къахьегама кинижка тӀа аз болх баь шераш дӀаяздаь латт. Из пенси мара сона хьатӀадоагӀаш ахча дац, дегӀа могашал эшаенна хиларах, тахан болх бе низ болаш яц со», - яздаьд оарц дехача цу кхалсага.
Сага бокъонех волча викала белгалдечох, кхалсага хьада дезаш дола 27 эзар 978 сомах латташ дола пенси хьадоладалийтад. Цул совгӀа, соцадаь лаьттача бетташка цун мел доагӀар а хьадалийтад. ДӀаьха шераш хьинаре къахьегаш дӀадихьача яхархочун бокъо меттаоттайир сага бокъонех волча викала.
