Дезала, наьна гӀулакхех йола яхьаш дӀахьоргья вай мехкахочо
Маьре болча кхалнаха юкъе дӀайихьача «Россе миссис» яхача ерригача Россе яхьашка котало яьккхача вай мехкахочунна ший лаьтта дезала, наьна гӀулакхех йола яхьаш дӀаяхьа бокъо елар. Лакха начӀал дола ноаной гучабоахаргба цу гӀулакхо. Из хоам «Сердалога» бир котало яьккхача кхалсага гаргарча наха.
«Укх 26 шера дӀахьош латтача цу йоккхача яхьашка дакъа лаца, хӀанз эггара хьалха аьттув баьлар вай мехкахочун. Бохтаранаькъан Лейла хьалхара я цу юкъе вай мехкара. «Россе миссис» яха цӀи яларал совгӀа, «Star Woman World» («Дунен белгалъяьнна кхалсаг») яха совгӀат даларо моллагӀча дунен яхьашка ший мохк гойта аьттув лу цунна», - дийцар тхога.
«Са проекто дерригача дунен дӀахойтаргда, ГӀалгӀай мехка лакха начӀал дола, аьттув бола кхалнах дуккха болга», - белгалдир Лейлас.
ТӀехьарча диъ шера фриланс оалача оагӀонца бувзам лелабеш, цӀагӀа яггӀаше болх беш хьайоагӀа дезала нана. «Укх шерара нана» яха цӀи елар цунна дӀадахача шера Ӏай.
