2024 шера гурахьа, культуран цу моттиго кийчйир «Дийнача дегай дагалоаттам» яха сайре, цӀихезача режиссёра, сценариста, актёра Мамилганаькъан Сулумбика сийна. Цо доккха дакъа юкъеденад советски, российски кинематографена.

Кхувш йоагӀача тӀехьенна юкъе хьехама болх дӀабихьаб, вахара

ийрча моттигашца къовсам лоаттабеш. Наркомани, кхыдола во наькъаш леладергдоацаш; мехка столице «Наркотикаш йоаца вахар», «Наркотикашка – «ак» ала!» яха кхетаченаш йир.

Эггара гӀалгӀай исторен чухь нийсъенна балан оагӀув хьайийллар, ЦТКиКИ дагалоаттама сайре дӀахьош. Из хетаяь яр вай къам Сибре дигара. Гулбеннарашта гойтар режиссёра Зортанаькъан Мадинай «Сона дагайоагӀа Казахстан» яха фильм.

«Тхона дицлургдац» яха болам хетабаь бар терроризмаца къовсам лоаттабара Денна; цига гулбелар хьехархой, дешархой, студенташ. Из лаьрхӀа яр бахархоша уж ийрча хӀамаш юхатохара юкъе дика дакъа лацара. Мехка дукхача бахархоша дика мах оттабир «ГӏалгӀай кинематографисташ российски, дунен кино хьадолалуча» яхача кхетаченна, из хетаяь яр цӀихезача, ткъестлагӀа бӀаьшере чакхйоалаш, ткъоалагӀа бӀаьшере дӀайолалуш йолча ханашка кинеметографи дегӀайоалаеш къахьийгарашта. Программа чудоагӀаш дар культуран болхлой вахара истори, дунен кинематографе юхьиг дӀайолалуча хана Америке болх беш хиннарашта.

Цу Центро дӀабихьача балха юкъе, дӀадахача 2024 шера баь болх хьаийцача, эггара наха дезаденнарех дар «Этнически ашарий сайре» яха концерт, иштта «Дегагара дегага» яха сагӀа даккхара дола концерт. Из бахьан долаш; берашта, могашал яйнарашта йоккхийча таронашца цхьацца Ӏалашо йир.