2025-ча шера 24 бера-бонна квартираш лургья
Укх шера республике дӀадоладергда 165 эзар кв. м кхоачаш дола гӀишлон балхаш, 24 бера -бонна чуӀе моттигаш Ӏалашъергья. Цох лаьца дийцар гӀишлошъяра балхех йолча министерствон кулгал деча Иленаькъан Мусас «Хоамаш» яхача журнала болхло волча Кисин Сергейна, Ӏаьдала моттигашцарча балхах йолча «ЕвроМедиа» холдинга департамента кулгалхочун гӀонча йолча Мельник Таисияйна.
Иленаькъан Мусас журналисташка дийцар дӀадахача шера гӀишлошъяра балхашца хиннача толамех, иштта укх шера кхоачашде дезарех а.
«Цхьацца къаман проекташка гӀолла 25 гӀишло я вай мехка укх шера хьалъеш латташ, царех 19 гӀишлонцара болх 2025-гӀа шу чакхдалалехь йистебаьнна хила безаш ба. Уж я берий бешамаш, ишколаш, унахцӀенон, спорта, культуран оагӀонцара моттигаш. Иштта, лаьрхӀар кхоачашдеш, 9 муниципальни оагӀон 23 моттиг тоае езаш да тхо, 165 эзар кв. метрага кхоачаш йола гӀишлош я кийча хила езараш, 24 бойла дисача бера квартираш хилийта еза», - белгалдир министра.
ХӀаьта укх шерара эггара йоккхагӀа, лоархӀамегӀа йола проект я, Эса тӀара 100 эзар кубометр хий дийнахьа хьаоза низ болаш йола водозабор. Харцар кхерам болча фусамашкара нах арабахарах йолча программага гӀолла, 30 цӀагӀара 138 cаг фусамашка дӀанийсваьв.
Федеральни проекта паспортага гӀолла 2024-гӀа шера, 2019-гӀа шергара дӀадоладенна, 310 саг вар ваха хоаве везаш, из таьрахь тӀа-тӀа лакхлуш, 5 500 кв.метр цӀенош царна хьадеш. Карарча хана дӀачувахийтараш 635 саг ва, 6 692, 20 кв. м цӀеношка. Цо хьагойт, болх боарамал тӀехбоалаш чакхбаьккхалга», - белгалдир гӀишлошъяра балхех йолча министерствон кулгалхочо.
