2026 шера бойла дисача 25 бера даха фусамаш лургья
ГӏалгӀайчен Ӏаьдал лаьрхӀа да, бойла дисача берашта фусамаш къоастаяра лоархӀаме болх дӀабахьа, яхаш, хоам бир «Сердало» газетага ГӏалгӀай Республикан зарбан-болх лелабераша.
«Дӏадахача шера оаха бойла дисача берашта 24 квартира елар. Белгалде лов, вай республике зӀамига фусамаш еш цахилар, хӀаьта квадратни метра мах тӀакхеташ латт.
Федеральни оагӀорахьа хьадоагӀаш дола ахча кхоачам болаш хилац, из хаттар ма дарра кхоачашдара. Цудухьа, дӀадахача шерашка санна, аз лаьрхӀар 30 млн сом дӀадахийта ГӏалгӀайчен Къаман фондера.
Из бахьан долаш таро хилар 2025 шера из план бӀарчча дӀакъовла», - аьлар республикан кулгалхочо Келаматанаькъан Махьмуд-Ӏаьлас, цу лоархӀамеча хьалах дувцаш.
2026 шера, мехка цу тайпара болх дӀахьоргба, 25 бонна фусамаш лургья. Махьмуд-Ӏаьлас аьлар, из дош кхоачашдар чӀоагӀа лоархӀаме хиларах, цудухьа ше кийча ва дукхагӀа уж эшачарга кхачийтара новкъостал де.
