МагӀалбика администраце кхетаче хилар хӀама хозаш боацача нахаца
Магӏалбик-Шахьара администраце доал деча даькъ тӀарча кулгалхочунца Галай М. кхетаче хилар, «Ерригроссийски хӀама хозаш боацача» заӀапхой юкъарча моттигаца. ГӏалгӀай моттигера ВОГ отделене кулгалхочо Тоаркхой Р., цун гӀончас Ахтоланаькъан Х. дийцар, кагирхошта, заӀапхошта болх лохача даькъ тӀа хьалхашка нийслуча халонех, иштта цхьана болх дӀабахьара де дезачох.
«Галай Мусас терко тӀаяхийтар дийцача деша. Цо белгалдир, могашал эшаеннача наха вахаре гӀо дар, шахьара администраце керттера декхар хилара. Администраце кулгалхочо ВОГ викалашта чӀоагӀо йир, цу наха болх лахара дола хаттараш кхоачашдергда, законах доагӀаш долча беса уж хьаллоацаргба», - аьлар «Сердало» газетага МагӀалбика-Шахьара администраце.
Цу кхетачено хьагойтар, МагӀалбика бахархой хаттараш кхоачашдара, администраце массайолча оагӀорахьара терко лоаттаеш, иштта заӀапхой юкъарлонца бувзам лелабеш хилар.
