Магӏалбика кхален администраце лоархӏамеча декхарех дийцар
Администраце кулгалхочун декхараш кхоачашдеш волча Къоастой Руслана кулгал деш, кхетаче дӏахьош хилар Магӏалбикерча мэре. Юрташкарча администрацешкара кулгалхой, иштта кхыбола цу оагӏонцара болхлой бар гулбенна хиннараш. Кхален вахара-экономически хьалаца дувзаденнараш дийцар кхетаче.
«Къаьстта йоккха терко йир ЖКХ оагӏонцара декхараш ханнахьа дӏателарца дувзаденнарашта. Наха тӏалатташ долча декхараша цу оагӏонцарча балха хьал геттара эшаду. Хьатеха декхар ханнахьа дӏателар мел эшаш да хьалхадоаккхаш бола болх бахархошца дӏакхахьар лоархӏаме долга белгалдир кхетаче. Къаьстта йоккха терко е езарех да цу оагӏонца дувзаденнараш», - дийцар «Сердалога» Магӏалбика кхален администраце.
Иштта цига терко йир бахархошкара тӏалаттача хаттарашта. СВО доакъашхой, цар цӏагӏарча наьха дехарашта массахана лакха терко лоаттае езилга белгалдир гулбеннараша. Юрташкарча администрацешта хьалхалаттарашта тӏадиллар, цу оагӏонцара болх тӏатеӏӏа дӏахьо, аьнна.
СВО доакъашхошца, цар цӏагӏарча нахаца массахана бувзам болаш хила беза хьакимаш, цар тӏадена гӏулакх, гаьна ца доаккхаш, тахка деза. Кхален моттигашка лаьттан доазош къоастадарах дийцар. Вай Мехкадас тӏабилла, дӏахьош болх ба из. Хьакимаша дийцар кхоачашде аьттув баьннарех, иштта дӏахо йодача хана де дезарех.
