«Ишколе даха кийчде бер» яхача боламе дакъа лоацаргда, Паччахьалкхен Думан депутата
Ишколе дӀачудолхача берашта доккха совгӀат дир Паччахьалкхен Думан депутат волча Татренаькъан Муслима. 200 совгӀа долча бера, эшаш мел бола кхоачам чубола тӀормигаш делар цо. Цул совгӀа, берий аниматораш юкъе болаш тайп-тайпара яхьаш, гойтамаш дӀадихьар дог гӀоздаьннача берашца. Шоай начӀал гойта, совгӀаташ дӀаийца бераш чӀоагӀа гӀаддаха дар.
«Оаха хьаллоац «Ишколе даха кийчде бер» яха, хӀара шера дӀакхухьаш бола болам. Къаьстта йоккха терко е езаш да тӀема операцен доакъашхой бераш. Кхыча оагӀонца царна эшар, дезар фуд хьож тхо. Беркате, иразе хилда цар дешара шу!» - аьлар Татренаькъан Муслима.
Белгалде деза, из беркате гӀулакх вай мехка Келаматанаькъан Махьмуд-Ӏаьлас могадаь хиларца дӀахьош долга. Цу юкъе дакъа лоацаш хул; тӀема операцен доакъашхой берашта, хала боахкача дезалерча дешархошта гӀо де ловраш.
