Милице болхлочун сийна, «Турпалхочун парта» хьайийллар Ӏаьлий-Юрта
Милице воккхагӀа вола лейтенант хиннача Гаьгенаькъан Мухьмада сийна «Турпалхочун парта» хьайийллар, Ӏаьлий-Юртарча гимназе. Цига дакъа лоацаш хилар, Красноярскерча цхьан мандатах йолча хоржамий моттигага гӀолла Паччахьалкхен Думан депутат вола Швыткин Юрий, иштта парте кхыбола доакъашхой. Из хоам «Сердалога» бир гимназе.
«Кхетаче йолча къамаьл дир лейтенанта цӀен-нанас, гимназерча берий даьй совета доакъашхо йолча Гаьгенаькъан Мусай Маккас, бераша, Паччахьалкхен Думан депутат волча Татренаькъан Муслима, «ЦаӀ йола Росси» яхача парте моттигерча оагӀонна кулгал деча Кхоартой ИбрахӀима. Иштта цига йистхилар МВД ветеранашта хьалхалатташ вола Къоастой Мухьмад-Сали, Ӏаьлий-Юртарча администрацена кулгал ду Овшанаькъан Хьамзат.
2009-ча шера маьцхали бетта 17-ча дийнахьа, Наьсарен кхалерча РОВД ший декхараш кхоачашдеш, вахар хаьдар Висита Мухьмада. РОВД коа машенаца чуийккхача террориста никъ бехкаш, автомат етташ, эггара хьалха духьалведдар из вар. Денала орден елар цунна. АллахӀа къахетам баь, ялсмален хьаьша хилва цох!
Дала гешт даьрех хилва!» - дийцар тха газетага. 2009-ча шера, бӀехача зуламхоша даьча хатарах, 20 сага вахар хаьдар, 150 сага човнаш йир. Дала гаьнабоахалба зуламхой!
