ӏаьлий-Юрта экстремизмах, терроризмах дийцар
Гӏалгӏай Республикан кагирхой гӏулакхех йолча комитето гергача истола гонахьа къамаьл дир экстремизмах, терроризмах лаьца. Из хоам бир «Сердало» газетага Гӏалгӏай Республикан КДМ болхлочо Гӏулой Аминас.
Из болх боаржабир Наьсарен кхален ӏаьлий-Юртарча гимназе. Шерра дӏахьош долча вӏашагӏкхетаро таро елар хьехархошта эггара чоалханегӏа латта моттигаш ювца, уж дар тахан кагирхой харцахьарча наькъ тӏа баха гӏерташ юкъедоахаш дола терроризма наькъаш. Хьехархой керттера дакъа дӏалоацаш ба тахан кагирхошта дика кхетам луча, цудухьа юкъарлон викалаша лаьрхӏар из хьал царца дувца.
Кагирхой гӏулакхех йолча Комитета керттерча говзанчас, Лаьрххӏача операце ветерана Шоанахой Муслима белгалдир, хьехархоша хьалхарча аргӏагӏа дешархой вахара наькъ тӏа боахаш хилар. Гӏалгӏай Республикан КДМ патриотически отдела кулгалхочо Гоамакортанаькъан Мустафас аьлар, интернет-даькъ тӏа дукха моттигаш нийслуш хилар, кагирхой цу бӏехача «гӏозара» юкъебаха гӏерташ. Цо иштта могадир юкъарча дешара моттигашка патриотически кхетам балара болх ма хулла дукхагӏа дӏабахьар.
