ГӀалгӀайчен исторех дола лоархӀаме каьхаташ корадир, хӀирий мехкарча архивера
Вай къаман лоархӀаме хӀама гучадаьккхар «АСМ-Групп» яхача оагӀон болхлоша. ЦӀихеза хиннача, Кавказ тохкаш лийннача Семенов Л.П. хьалха цхьаннахьа кепа теха ца хинна сурташ, каьхаташ корадир хӀирий мехкарча архивера.
Из хоам «Сердалога» бир мехка кабминера.
«Семенова сурташ, каьхаташ вай къаман культурах, исторех бола лоархӀаме хоам ба.
«Вай болх» яхача ший статья тӀа Ӏилманхочо язду, лоамашкара гӀалаш тохкаш боккха болх дӀабахьа безилга», - йоах хоамо.
БӀаь шу хьалха цу сага яздаьр, тахан лоаман гӀалай вахар тохкаш вай дӀахьоча балхаца хотталуш да. «САФМАР», «Меттаоттадар» яхача гӀо деча ганзашка гӀолла боккха болх дӀахьош, тоаеш латт вай культуре, исторе лоархӀаме моттиг дӀалоацаш йола вай даьша яь гӀишлош.
ГӀалгӀай къаман вахарца дувзаденнача исторе хӀара шера цхьацца лоархӀамедараш гучадувлаш латт. Тохкама болхлоша къахьегаргда вай исторен оагӀонаш ма ярра гучайоахаш.
