ДегӀа зе деш йола молхаш ца тохаш, мерза харбазаш кхею Берда-Юрта
Берда-Юртарча «Иленаькъан кхача» яхача кооперативе тахан кхееш йола харбазаш; унахцӀенон зе деш йола молхаш тоханза, мерза, дика кхаьча я. Из хоам «Сердалога» бир Шолжа кхален администраце.
«БоаггӀача боараме доал деш, харбаз сихагӀа кхачийта гӀерташ юкъекхувлаш дола зе деш дола хӀамаш хьатӀа ца эцаш, кхееш я иштта чаме йола, вайна массанена дукха еза харбазаш. Пхи гектар оахам тӀара 150 тонн гаргга из мерза кхача чуэц цига цхьан шера», - дийцар тхога.
Цу боахамга хьажа ваха хилар вай мехкада Келаматанаькъан Махьмуд-Ӏаьла. Лакхача боараме оттабир мехка кулгалхочо цига дӀахьош бола болх.
ДӀайийна хӀама ма хулла дикагӀа хьахургйолаш, мел эшар леладу цар. Кхаш тӀа боаггӀача боараме хий деттаргдола гӀирсаш оттаде лаьрхӀа ба уж.
Белгалде деза, вай мехка тахан АПК къахьегараш хӀара денна дукхагӀа хулаш латтилга. Хоза, беркате масал да из дерригача къаманна.
