Ер шу чакхдалале, кийча хила езаш я Берда-Юртара керда ишкол
Ер шу чакхдалале, ший наӀараш хьаелла езаш я Берда-Юртара керда ишкол. 1,5 гектар доазув дӀалаьца йолча ишколо моттигаш лургья 250 дешархочунна. «Кит-Строй» яха гӀишлон балхаш деш йола моттиг я дӀадахача шера из болх дӀаболабаьр. ГӀишлошъяра балхех йола Министерство я цу гӀулакха хьалхалаттар.
«Кхозза вӀаштӀара яь ишкол 5236,1 кв. метрага кхоачаш я. Таханарча дийнахьа 80%-га кхоачаш болх йистебаьннаб цига. Пенаш шаьрдаь, кораш дӀаоттадаь баьннаб; плитка, керамогранит Ӏобуллаш боахк болхлой тахан», - дийцар «Сердалога» министерстве.
Дешара хьал тоадарах йолча паччахьалкхен программага гӀолла дӀахьош ба из беркате болх. Мехкарча ишколашкара хьал дикка аттачахьа доаккхаш хургда керда ишколаш хьаеллар. Актови зал, дешара зал, спортзал, иштта кхача кийчбу, хӀама дуа моттигаш я ишколе.
Спорта лаьрхӀа доазув тоадаьд коа. ЦӀенача фега урокаш дӀакхахьа аьттув хургба берий. Берашта, хьехархошта мел эшар долаш я таханарча хано дӀадеххача тайпара тоаеш латта ишкол.
