250 бера лаьрхӀа керда ишкол хьалъеш латт Берд-Юрта
250 бера лаьрхӀа йолча Берда-Юртарча кердача ишколо кастта ший наӀараш хьаелларгья, дешархой тӀаэцаш. 1500 кв. м доазув да ишкола дӀаденнар. «Дешар» яхача къаман проектага гӀолла дӀахьош, беркате болх ба из. Таханарча дийнахьа 80% болх чакхбаьккха баьннаб къахьегамхой.
«Кораш дӀаоттадаь, бӀеха хиш дӀауха, йӀовхал хьалу моттигаш тоаяь баьннаб. Чура пенаш хьоахаш, йӀовхала гӀирс чухьа оттабеш боахк тахан болхлой. Иштта тоадеш латт ишкола ков а», - дийцар «Сердалога» дешареи Ӏилмани гӀулакхах йолча министерстве.
Берашта мел эшар чудолаш хургья керда ишкол. Таханарча хано дӀадеххача тайпара, хьалъеш латт из. Йоккха спорта, нах гуллуш йола, книжка дешаш йола залаш, даа хӀама кийчде паргӀата моттиг хургья цига. 1-ча классагара 11-ча классага кхаччалца долча берашта, ловза моттигаш тоаергья коа. Юртарча бахархошта доккха совгӀат хиннад кердача ишколах.
